ನವದೆಹಲಿ: ಫೈಸಲಾಬಾದ್‌ನಲ್ಲಿ ಭಾರತ ವಿರುದ್ಧದ 2006ರಲ್ಲಿ ನಡೆದಿದ್ದ ಟೆಸ್ಟ್ ಸರಣಿಯ ಎರಡನೇ ಪಂದ್ಯದ ವೇಳೆ ಎಂಎಸ್ ಧೋನಿಗೆ ಉದ್ದೇಶಪೂರ್ವಕವಾಗಿ ಬೀಮರ್ ಹಾಕಿದ್ದ ಬಗ್ಗೆ ವಿಷಾದಿಸುತ್ತೇನೆ ಎಂದು ಪಾಕಿಸ್ತಾನದ ಮಾಜಿ ವೇಗಿ ಶೋಯೆಬ್ ಅಖ್ತರ್ ಒಪ್ಪಿಕೊಂಡಿದ್ದಾರೆ. 

ಇದೇ ಪಂದ್ಯದ ಮೊದಲ ಇನ್ನಿಂಗ್ಸ್‌ನಲ್ಲಿ ಧೋನಿ ತಮ್ಮ ಚೊಚ್ಚಲ ಟೆಸ್ಟ್ ಶತಕವನ್ನು ಗಳಿಸಿದ್ದರು. ಶೊಯೆಬ್‌ ಅಖ್ತರ್‌ ಬೌಲಿಂಗ್‌ನಲ್ಲಿ ಧೋನಿ ಮೂರು ಬೌಂಡರಿ ಬಾರಿಸಿದ್ದರು. 

ಇದಾದ ಬಳಿಕ, ರೌಂಡ್‌ ದಿ ವಿಕೆಟ್‌ ಪಡೆದ ಮಾಜಿ ವೇಗಿ, ಭಾರತೀಯ ವಿಕೆಟ್‌ ಕೀಪರ್‌ಗೆ ಬೀಮರ್‌ ಹಾಕಿದರು. 14 ವರ್ಷಗಳ ನಂತರ, ಅಖ್ತರ್ ಅವರು ಧೋನಿಗೆ ಹತಾಶೆಯಿಂದ ಬೀಮರ್ ಅನ್ನು ಉದ್ದೇಶಪೂರ್ವಕವಾಗಿ ಬೌಲ್ ಮಾಡಿರುವುದಾಗಿ ಎಂದು ಒಪ್ಪಿಕೊಂಡರು.

"ಫೈಸಲಾಬಾದ್‌ನಲ್ಲಿ 8 ರಿಂದ 9 ಓವರ್‌ ಬೌಲಿಂಗ್‌ ಮಾಡಿರಬಹುದು ಎಂದು ಭಾವಿಸಿದ್ದೇನೆ. ನನ್ನದು ತ್ವರಿತಗತಿಯ ಸ್ಪೆಲ್‌ ಆಗಿತ್ತು ಹಾಗೂ ಎಂಎಸ್‌ ಧೋನಿ ಶತಕ ಗಳಿಸಿದ್ದರು. ಅಂದು ಹತಾಶೆಗೆ ಒಳಗಾಗಿದ್ದ ನಾನು ಉದ್ದೇಶ ಪೂರ್ವಕವಾಗಿ ಧೋನಿಗೆ ಬೀಮರ್‌ ಹಾಕಿದ್ದೆ, ನಂತರ ಅವರ ಬಳಿ ಕ್ಷಮೆ ಕೋರಿದ್ದೆ," ಎಂದು ಆಕಾಶ್‌ ಚೋಪ್ರಾ ಯೂಟ್ಯೂಬ್‌ ಚಾನೆಲ್‌ನಲ್ಲಿ ಮಾತನಾಡುವಾಗ ತಿಳಿಸಿದರು.